ائلینده ن آیری آتا

گؤی    اوخشاما    دئییر  بولود  آغلایر

کولکده    هاراسا    یامان    تله سیر

بیر    آتا    عومرونون    کؤچون  باغلایر

روحو    قورتولمادا      بدنی      اسیر

قایغی کئش  آتانی  قورخو   بوروموش

گؤزلری  یاشاردی   دوداق    تیتره دی

قاسیرغا   الینده    اسن      آغاج تک

 یارپاق  سیزیلدادی  بوداق  تیتره دی

یئلکن سیز    گمییه    بنزه ر    اومودو

فلکده   قامچیلا   ایز   قویوب    گئدیر

آتا سئوینجینده ن     چیرپان  اوره یین

یاشیل باغچاسیندا  کؤز قویوب گئدیر

آخ ا ئلینده ن   آیری  یوردوندان  اوزاق

واختسیز   اجل ایله  دوئله چیخمیش

زامان دایانمیشدی  هاوا چوخ سیزاق

تورپاقدان  یارادان   تورپاقا    یخمیش